Club de lectura e criaturas fantásticas

A piques xa de rematar o curso e con el a nosa andaina co club de lectura, propoñémosvos estas actividades cos libros lidos este ano feitas en JCLIC, que nos han servir para autoavaliarnos. Se preferides ver en pantalla completa, picade na ligazón. En breve faremos a excursión que tiñamos programada e á volta teredes máis novas nosas. Ata logo.

El príncipe de la niebla

No segundo trimestre, despois do bo sabor de boca que nos deixou a triloxía de "Los juegos del hambre", aventurámonos con outra. Neste caso dun autor español, Carlos Ruiz Zafón. Os libros en cuestión son "El príncipe de la niebla", "El palacio de la medianoche" e "Las luces de septiembre".

Como mediador que fun do club de lectura, dende a situación de xubilación, asumo os compromisos contraídos cos rapaces e rapazas do club así como con Isabel, a profesora que me substituíu. Sigo formando parte do club, aínda que non de xeito presencial.

Pois ben, coma no caso anterior, elaboramos unha presentación colectiva do primeiro libro da triloxía, da que veño de facer a montaxe. Podédela ver a continuación.

El principe de la niebla from bibliobaralla

Los juegos del hambre

O primeiro libro que lemos este ano no club de lectura "Barallando libros" foi "Los juegos del hambre", de Suzanne Collins. Enganchounos de tal maneira que todos quixemos ler a triloxía enteira: Los juegos del hambre, En llamas e Sinsajo. Algúns aventurámonos tamén con Hermosas criaturas. Este curso estamos a ler libros coa temática do PDI "Criaturas fantásticas". Por certo, nesta triloxía hai ben delas.

Elaboramos unha presentación co primeiro libro da triloxía que podedes ver seguidamente. Cada lector/a encargouse dunha diapositiva.

Los juegos del hambre from bibliobaralla

Club de lectura 2013-2014

Un ano máis comezamos as actividades do club de lectura. Este curso farémolo con todo o alumnado de segundo de ESO. A principal novidade é que utilizaremos o soporte dixital para as nosas lecturas. Todos os e-readers da biblioteca están distribuidos entre os membros do club. Outros alumnos/as utilizan os propios dispositivos. O mediador do club de lectura compra os libros dixitais e pásallelos aos lectores e lectoras por correo electrónico para que o suban aos dispositivos de lectura.Por certo, a comezo de curso adquirimos dous novos dispositivos idénticos ao da imaxe. Agardamos un uso responsable destes aparellos.

O poder das palabras

O 31 de maio de 2013 celebráronse en Santiago as VI Xornadas dos clubs de lectura. Nesas xornadas participou o noso club de lectura, "Barallando libros", cunha comunicación titulada "O poder das palabras". A comunicación centrouse en como un club de lectura axuda á adquisición das competencias básicas. O marco da nosa intervención foi nunha Mesa de experiencias das catro provincias.

Aquí tedes o vídeo desa Mesa facilitado pola Asesoría de Bibliotecas Escolares.

Roteiro literario "Pola Mariña"

Como xa vén sendo habitual ao remate de cada curso, subimos ao blog o roteiro literario do club de lectura. Este ano foi pola Mariña. Comezamos en Mondoñedo, terra de poetas e de lendas ben fermosas. Logo fomos ao Valadouro onde visitamos a finca "A Galea" con moitos artiluxios movidos pola forza da auga. Ao día seguinte comezamos en San Miguel de Reinante visitando a casa que aparece en "de Profundis", a praia de As  Catedrais, Ribadeo, Castropol  (bar O Risón, relacionado cun libro de Gonzalo Moure) e Taramundi. Foron dúas xornadas ben fructíferas.

Pola mariña2 from bibliobaralla

Club de lectura 2012-13

Este curso seguiremos co club de lectura. Todo o alumado de 3º de ESO está inscrito nel. Tentaremos traballar  a temática do PDI "Cine e Literatura".   Deste xeito, simultanearemos a lectura de libros co visionado dos filmes feitos sobre eles.

Comezamos vendo a película "Diarios de la calle", que reflicte o ambiente marxinal e o fracaso escolar e social do alumnado que o sofre. A profesora recoméndalles ler o "Diario de Ana Frank" para facerlles ver que aínda se pode estar peor. Ese será tamén o segundo libro que leremos e a posibilidade do visionado do filme.

O terceiro libro e película, "Luna de lobos" segue polos mesmos derroteiros, aínda que neste caso a marxinación non é de tipo racial senón ideolóxica.Clicando nas imaxes ou ligazóns podedes acceder aos traballos que preparamos sobre os libros e filmes. A continuación tedes un deles.

Roteiro Fiz Vergara Vilariño

O día 20 de xuño fixemos a viaxe programada do noso club de lectura. Agardamos ata esa data para facer a excursión relaxados/as, co curso xa rematado. A experiencia deixou en todos nós un bo sabor de boca, non só polo xantar, que tamén, senón polas imaxes que gardaremos para sempre nas nosas retinas.

Fiz Vergara Vilariño é o poeta da Lóuzara Xiabreira, como el lle chama á súa terra. A vida foi unha cabrona con el negándolle o máis incuestionable do ser humano: o amor. Fiz cántalle a este amor soñado e nunca tido no marco incomparable da natureza louzariña con palabras puras e sinceras.

Con este roteiro queremos render homenaxe a unha persoa que sufriu os sensabores da vida e que só atopou na poesía consolo para os seus males. Di D. Xesús Alonso Montero que fixo literatura como defensa contra as ofensas da vida.
Aquí tedes unha reportaxe gráfica deste roteiro:

Roteiro Fiz Vergara Vilariño - presentacion imagenes

La puerta trasera del paraíso

O segundo libro foi "La puerta trasera del paraíso". Con el, mergullámonos na problemática do pobo saharaui. Para ter unha lembranza del, fixemos esta presentación.

LA PUERTA TRASERA DEL PARAISO

View more presentations or Upload your own.

Páxinas Literarias

Os dous primeiros libros que lemos no club de lectura están incardinados no proxecto documental integrado que estamos a desenvolver no centro neste curso: Culturas do mundo. Xa falamos do libro "Donde aprenden a volar las gaviotas",ambientado en Noruega. Sobre el o alumnado do club elaborou esta presentación:

Páxinas literarias

View more PowerPoint from bibliobaralla

Donde aprenden a volar las gaviotas

O primeiro libro que lemos este ano no club de lectura foi unha historia ben fermosa que nos achegou a temas tan importantes como o sensentido das guerras, mergullounos na cultura nórdica (este ano traballamos as culturas do mundo) a través dunha viaxe por Noruega e fíxonos vibrar con dúas historias de amor que endexamais esqueceremos. Este libro ímolo tomar como referente para as distintas conmemoracións do centro. Na presentación que vén de seguido podédelo comprobar.

 

Donde aprenden a volar las gaviotas on Prezi

Roteiro literario

A lectura do libro "El hombre que plantaba árboles", no Ano Internacional dos Bosques, propiciou unha viaxe ao Courel do noso club de lectura para establecer contacto directo cunha das xoias botánicas de Galicia: a Devesa da Rogueira. Foi unha xornada redonda que convertimos nun roteiro literario coa poesía de Novoneyra. Cada recuncho, cada cova, cada fonte...atopa a súa voz no bardo do Courel.

Visitamos a Estación Científica do Courel. Recibiunos o seu director: Javier Guitián, a quen agradecemos a súa amabilidade.

Tamén queremos agradecer a Ricardo Locay Aira, amigo do mediador do noso club de lectura, as facilidades para visitar a súa Ferrería, a Ferrería Locay.

Aquí tedes a crónica gráfica  e poética da viaxe.

Roteiro club de lectura

View more presentations from bibliobaralla

El hombre que plantaba árboles.

No club de lectura "Barallando libros" queremos celebrar o día mundial do medio ambiente compartindo con vós un libro que nos gustou especialmente: "El hombre que plantaba árboles". O día 21 iremos ao Courel para aprender máis cousas da natureza e dos bosques. Á volta, teredes información desta viaxe.

De momento, aquí tedes  esta presentación sobre ese marabilloso libro.

El hombre que plantaba árboles

View more presentations from bibliobaralla.